یا الٰہی امتِ خیر الوریٰ ﷺ کی خیر ہو

نعت شریف 

یا الٰہی امتِ خیر الوریٰ ﷺ کی خیر ہو

بے سہارا , غمزدہ , ہر بے نوا کی خیر ہو

آپ ﷺ کے صدقے خدا سے رزق پاتا ہے جہاں

آپ ﷺ کے لطف و عطا جود و سخا کی خیر ہو

ذکرِ احمد ﷺ کی سجاتے ہیں سدا جو محفلیں

عشق سے سرشار ان اہلِ ولا کی خیر ہو

راہِ حق میں دین کی تبلیغ پر جو گامزن

"ہر قدم پر عاشقانِ مصطفیٰ ﷺ کی خیر ہو"

جس کے صدقے سے زمیں پر ہر نگر آباد ہے

شہرِ طیبہ کی حسیں نوری فضا کی خیر ہو

لے کے چادر میں علی,حسنین,زہرا کو حضورﷺ

کہتے ہیں ، یا رب ، مری آلِ عبا کی خیر ہو

جس کو سن کے مومنوں کے دل سدا مسرور ہیں

رحمتِ عالم ﷺ کے ہر مدحت سرا کی خیر ہو

نعمتیں ہوتی رہیں ان پر عنایت بے بہا

مصطفیٰ ﷺ کے در پہ آئے ہر گدا کی خیر ہو

عنایت علی عنایت ، فیصل آباد