وجود اپنا مٹانا چاہتا ہوں

ہزج مثمن محذوف

مفاعیلن مفاعیلن فعولن

وجود اپنا مٹانا چاہتا ہوں 

محبت والہانہ چاہتا ہوں 

دیار دل سجانا چاہتا ہوں 

مقدر آزمانا چاہتا ہوں

گھنی زلفوں کے سائے میں کسی کے

سکوں دل کا گنوانا چاہتا ہوں

حماقت یہ نہیں میری تو کیا ہے

تمہیں اپنا بنانا چاہتا ہوں

ستم گر زخم دے کوئی نیا پھر

میں کھل کر مسکرانا چاہتا ہوں

مرا دل کا توازن کھو گیا ہے 

 تجھے دلہن بنانا چاہتا ہوں

کسی مے خوار، صوفی، رند سے میں 

تعلق رہبرانہ چاہتا ہوں

میاں اب عشق کے مارے ہُوؤں کی

نئی دنیا بسانا چاہتا ہوں

مجھے توفیق و ہمت دے خدایا 

میں ہر وعدہ نبھانا چاہتا ہوں

دے لمبی عمر والد کو خدایا

میں بوجھ ان کا اٹھانا چاہتا ہوں

خدایا ماں رہے میری سلامت

ابھی میں مسکرانا چاہتا ہوں

وفا کی دیکھئے پر خار رہ پر

قدم اپنا جمانا چاہتا ہوں

گلہ ترکِ تعلق کا نہیں ہے

عداوت مخلصانہ چاہتا ہوں

تمہاری صحبتوں میں رہ کے کاظم

 سخن میں عارفانہ چاہتا ہوں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کاظم شیرازی۔ 23 جنوری 2024