اغیار بھی رحمت کا مزہ لوٹ رہے ہیں

بحر، ہزج مثمن اخرب مکفوف محذوف

افاعیل، مفعول مفاعیل مفاعیل فعولن 

اغیار بھی رحمت کا مزہ لوٹ رہے ہیں 

سب لوگ عبادت کا مزہ لوٹ رہے ہیں 

صد شکر ہے اللہ کا کہ اس ماہ میں ہم سب

۔ہر قسم کی نعمت کا مزہ لوٹ رہے ہیں۔

حفاظ تراویح میں قرآن سنا کر

پر نور تلاوت کا مزہ لوٹ رہے ہیں

قرآں کی تلاوت جنہیں آتی نہیں وہ بھی 

قرآں کی سماعت کا مزہ لوٹ رہے ہیں

حق جو بھی غریبوں کا ادا کرتے ہیں اکثر

وہ لوگ ہی دولت کا مزہ لوٹ رہے ہیں

جس ذات کے صدقے میں بنائی گئی دنیا

اس ذات سے نسبت کا مزہ لوٹ رہے ہیں

یہ فضل ہے اللہ کا افطار میں ہم سب

روزہ کی حلاوت کا مزہ لوٹ رہے ہیں

ماں باپ بھی خوش جن سے ہیں سچ پوچھئے کاظم

دنیا میں وہ جنت کا مزہ لوٹ رہے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

✍ محمد کاظم شیرازی 📜 19:4:2021

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔